(حفیظ تائب)۔ خوشبو ہے دو عالم میں تری اے گُلِ چیدہ

خوشبو ہے دو عالم میں تری اے گُلِ چیدہ
کس منہ سے بیاں ہوں ترے اوصافِ حمیدہ

تجھ سا کوئی آیا ہے نہ آئے گا جہاں میں
دیتا ہے گواہی یہی عالم کا جریدہ

اے ہادیء برحق تری ہر بات ہے سچی
دیدہ سے بھی بڑھ کر ہے ترے لب سے شنیدہ

اے رحمتِ عالم ، تری یادوں کی بدولت
کس درجہ سکوں میں ہے مرا قلب تپیدہ

تو روحِ زمن ، روحِ چمن ، روحِ بہاراں
تو جانِ بیاں ، جانِ غزل ، جانِ قصیدہ

(حفیظ تائب)۔